LP nangangkong katunga sa mayor sa One Cebu ilaha na

CEBU, Philippines - Nangangkon na ang Liberal Party ni gubernatorial candidate Hilario ‘Junjun’ Davide nga hapit katunga sa mga mayor sa kalungsoran ug dakbayan dinhi sa Sugbo nga kanhi sakop sa One Cebu ang nibali ug nagpasakop na sa ilang partido.

Gibutyag ni Davide atol sa interbyu sa DyDD nga pagkakaron duna na silay dili mominos 18 ka mga mayor ug wala pay labot ni Daanbantayan Mayor Maria Luisa Loot nga nipadayag na usab og suporta ngadto niya.

Matud ni Davide nahimong 18 ang mga mayor nga ila karung kaalyado human matigayon ang pinirmahay ug kasabutan alang sa alyansa tali sa Bakud party ni Danao City Vice Mayor Ramonito Durano III sa niaging semana.

Ang LP dunay orihinal nga siyam ka mga mayor nga sakop nga nidaug sa nilabay’ng 2010 election og dugangan kini sa laing siyam ka mayor sa Bakud party gikan sa kinto distrito.

Kini mao ang mga mayor sa lungsod sa Compostela, Carmen, Sogod, Catmon, Borbon, San Francisco, Puro, Tudela ug Pilar sa isla sa Camotes nga kaalyado sa Bakud ug bugtong ang mayor lang sa Liloan nga si Mayor Duke Frasco nga umagad ni Gob. Gwendolyn Garcia ug si Danao City Mayor Ramon “Boy” Durano nga higpit nga kontra sa politika ni Vice Mayor Nito Durano nga iyang igsuon maoy sa One Cebu.

Nagtuo si Davide nga dugang pang mga mayor sa One Cebu ang mobali unya sa dili pa moabot ang filling sa certificates of candidacy karung buwan sa Oktubre. Si Davide magpares unya kang Bise Gobernador Agnes Magpale sa 2013 election. (BANAT NEWS)