Eskuylahan sa Talisay kuyaw sa sunog - Dublois

CEBU, Philippines - Kasagaran sa mga tulunghaang pampubliko sa dakbayan sa Talisay nasuta nga migamit og mga substandard nga mga electrical wire   ug may uban pa nga misagop sa illegal tapping sa kuryente, matud ni City Fire Marshal Fernando Vondrad Dublois.

Si Dublois nga nahinabi sa mga tigbalita nagkanayon nga sa wala pa magsugod ang klase nakadawat sila og direktiba gikan sa rehiyonal nilang buhatan   nga nagmando sa pag-inspection sa tanang mga tunghaan sa dakbayan.

Gibutyag ni Dublois nga nasuta nila nga adunay mga tunghaang pampubliko sa Talisay nga migamit og sub-standard nga mga wire sa ilang electrical connection ug adunay mga illegal tapping nga kuyaw sa sunog.

Gawas sa maong problema sa Talisay Central School ug sa San Isidro Elementary School nabantayan nila nga ang agianan paingon sa gawas sa maong mga eskuylahan gagmay kaayo ug kun may ipahigayong fire drill maghuot ang mga estudyante sa maong agianan.

Matud ni Dublois nga kasagaran sa mga adunay problema mao ang mga karaang edipisyo sa pampublikong tunghaan .

Hinuon   ang mga bag-ong   tinukod nga mga edipisyo walay mga problema tungod kay moagi naman sila sa Bureau of Fire Protection (BFP) nga maoy mosuta kun nahisubay ba sa hustong sukod   ug kalidad ang ilang mga instalasyon sa kuryente.

Samtang sa mga pribadong tunghaan, si Dublois miingon nga wala silay nakitang problema tungod kay sa dili pa tukoron ang building   may mga specification bahin sa linya sa mga kuryente niini nga aprobahan sa BFP.

Unya may mga tulunghaan nga walay mga fire extinguisher busa gitutokan kini sa mga kabomberohan sa siyudad.

Gibutyag usab ni Dublois nga usa sa mga problema nga ilang nakita mao nga kasagaran sa mga karaang   eskuylahan tag-usa lang   ang exit ug entrance niini.

Ang BFP sa siyudad mihatag na og mga rekomendasyon sa mga tulunghaan nga adunay problema sa instalasyon sa suga ug sa mga fire exit, ingon man mga fire fighting equipment aron malikayan ang disgrasya.

Ang Talisay gibana-banang adunay 25 ngadto sa 30 ka mga eskuylahan sa gobiyerno nga naglangkob sa elementarya ug sekondarya.

Samtang aduna usab kini 10 ngadto sa 15 ka mga pribadong eskuylahan sa elementarya ug sekondarya. (BANAT NEWS)