Luna sa BFP-7 bawion sa siyudad

CEBU, Philippines - Kuhaon na sa kagamhanan sa siyudad sa Sugbo ang luna nga gitukoran sa buhatan sa Bureau of Fire Protection 7 diha sa N. Bacalso Street aron butangan og annex building sa Cebu City Medical Center. Tumong sa mayor nga mapalapdan ang CCMC ilabi na ang out-patient department ug tungod kay atbang lang ang BFP-7 ug CCMC maayong diha tukoron ang annex building sa CCMC.

Usa sa iyang plano nga butangan og taas nga sky walk nga magkonektar sa CCMC sa annex building kung madayon ang maong laraw.

Sumala pa sa mayor nga responsibilidad sa BFP nga mangita og ilang pwesto sanglit gamitonon kaayo ang maong luna aron mapadako og daghang tawo ang maserbisyohan sa CCMC.

Samtang ang executive assistant sa BFP-7 nga si Inspector Josephus Alboro nagkanayon nga gipadalhan sila og suwat gikan sa siyudad sa miaging buwan aron papahawaon sila sa ilang nahimutangan ug gitagaan sila og tulo ka buwan aron mapatuman ang kamandoan.

Giklaro hinuon ni Alboro nga aduna sila’y igong dokumento nga ikapakita nga ang maong luna gi-turnover na sa siyudad ngadto sa BFP niadtong Hunyo 22, 1987 busa wala sila’y plano nga mohawa sa ilang giistaran karon.

Gani gawas sa buhatan sa BFP-7, nalakip usab sa turnover ang pito ka mga substations busa panghinaut nila nga dunay mahitabong kausaban sa kamandoan sa siyudad.

Samtang si Rama misaysay kagahapon nga iyaha una nga ipasusi ang giingong mga dokumento sa BFP nga gipadala ngadto sa iyang buhatan.  (BANAT NEWS)