Hulyo 13

Negros Republic

CEBU, Philippines - 1852— Natawo ang rebolusyonaryong Negrense nga si Juan Araneta Molo, Iloilo ug uban sa iyang pamilya namuyo sa Bago, Negros Occidental. Si Araneta mas nailang si Don Juan nga nanag-iya og katubhan sa Negros Occidental. Siya maoy nagsugod sa gitawag kaniadtong Negros Republic pinaagi sa pagsulong sa Bacolod diin ang gahom sa mga Espanyol sa Negros magbase. Nobiyembre 5, 1898, nakadawat og mensahe si Araneta nga nagsugod na ang giyera tali sa mga rebolusyonaryo ug mga Espanyol, nianang pagkahapon uban sa iyang pwersa nga armado lang og mga bolo ug tulo ka armas nga usa ka Mauser, usa ka Remintong ug usa ka shotgun gisulong nila ang Bacolod. Sa motuo pa mo o sa dili, nailad ang mga Espanyol sa armadong rebolusyonaryo ni Araneta. Wala nila mabantaying ang gibitbit nga mga riple sa mga rebolusyonaryo mga ginama lang sa palwa sa nipa nga gipormang pusil, tungod sa kabalaka mitahan sila kang Araneta.

Rubik’s cube

1944— Gipanganak ang imbentor sa makalingaw apan challenging nga duwaang Rubik’s Cube. Si Erno Rubik usa ka Hungarian mathematician, educator ug inventor sa Rubik's Cube niadtong 1974 nga unang misikat niadtong dekada 80. Ang Rubik’s Cube dunay 26 ka gagmay’ng cubes nga matuyok sa central axis; siyam ka colored cube nga gilaray sa tulo ka linya sa matag kilid. Kun bungkagon ang pagka-arrange niini ang player kinahanglang mabalik kini sa orihinal nga pagka-arrange. Lakip sa naimbentong duwaan ni Rubik mao ang mechanical puzzles, Rubik’s Magic: Master Edition, Rubik’s Snake ug Rubik’s 360.

Nag-riot human sa kilat

1977— Miulbo ang kagubot sa mga residente sa New York dihang kalit nga nag-blackout human maigo sa nagsunod nga upat ka kilat sulod sa 30 minutos ang mga high-voltage transmission lines sa maong siyudad. Nagsugod ang pag-blackout alas-9 sa gabii hinungdan sa pagkawala sa suplay sa kuryente sa minilyong mga residente sa maong siyudad. Apan tungod sa krisis ug daghang mga tawo nga walay trabaho nahimong pabilo sa kagubot ang maong blackout ug gisugdan pagsunog sa mga tawo ang mga balay patigayon, gipangkawat ang mga panindang pagkaon, gamit ug uban pa. Nabalik sa normal ang suplay sa kuryente human sa 25 ka oras apan 4,500 ka mga tawo ang giaresto atol sa riot ug midanyos kini og $61 milyones. (BANAT NEWS)