Brgy projects gisubhan ni Rama

CEBU, Philippines - Gisubhan kagahapon ang nagkadaiyang proyekto sa siyudad sa Sugbo ngadto sa 12 ka mga barangay nga naglangkob sa drainage system, pagpasemento sa kadalanan ug pagpaayo sa mga dalan nga nangaliki.

Si Mayor Michael Rama maoy nangulo sa ribbon cutting uban sa iyang mga department heads sa kapin sa P45.7 milyones nga road projects sa Barangay Carreta, Budlaan, Mabini, Paril, Cambinocot, Lusaran, Adlaon, Taptap, Tabunan, Sudlon 1, Sinsin ug Malubog.

Sumala pa ni Rama nga gisagunson gyud niya ang pagpaayo sa mga dalan sa kabukiran gumikan kay makatabang kini sa hapsay nga pagkarga sa mga produktong gikan sa umahan nga dalhon paingon sa mga merkado.

Dugang pa sa mayor nga gawas sa maong 12 ka barangay, nagpadayon na usab ang pagpasemento sa ubang mga barangay ug gipasalig niining dugangan pa ang budget alang niini aron daghang barangay ang makabenepisyo niini.

Una na nga gipadayag sa mayor nga P400 milyones ang gidusong budget niya alang sa pagpaayo sa mga gubaong mga dalan sa siyudad apan ang giaprobahan sa konseho moabot lang ngadto sa P100 milyones.

Aminado hinuon ang mayor nga mapangitaan niya kini og paagi sama sa pag-request og supplemental budget.

Gipaniguro usab sa mayor nga wala ang iyang pangalan ug dagway sa nagkadaiya niya nga proyekto aron dili siya masaypang namolitika. (BANAT NEWS)

Show comments