Naunlod nga barko palutawon

CEBU, Philippines - Gisugdan na kagahapon ang operasyon sa pagpalutaw sa barkong puno og sinakong mga semento nga naunlod sa milabay’ng semana sa kadagatan sa barangay Canjulao dakbayan sa Lapulapu.

Matud pa ni Andy Berame sa Task Force Kalikasan (TFK) kagahapon sa buntag ilang nasigpatan ang mga tawo nga gikan sa kaulohan nga maoy gipatrabaho sa pagpalutaw sa barkong M/V B&E Uno ang barkong nalunod nga adunay kargang 23 mil ka sakong semento. Nasayran sa Banat News, ang Omega Steel and Marine Services maoy gitahasan sa tag-iya sa barko nga si Benjamin Go sa pagpalutaw sa barko.

Kagahapon sa hapon atol sa ilang padayong operasyon ila unang gisuta ang palibot sa maong barko kung wala bay miawas nga krudo aron maoy unang salbahon aron dili mokatap sa kadagatan.

Ang mga sakop sa Philippine Coast Guard ug TFK maoy nagmonitor sa operasyon.

Matud pa ni Berame nga kinahanglang palutawon dayon ang maong barko subay sa kamandoan ni Lapulapu City Mayor Paz Radaza tungod sa kabalaka sa mayor nga dunay makadaot nga epekto sa dagat ang oil spill ug ang mahilis nga semento sa ilawom.

Kahinumduman nga mibahad si Radaza nga ilang kasuhan si Go kung mapakyas kini sa paghimo og lakang nga makuha dayon ang maong barko tungod kay nabalaka siyang maapektahan ang panginabuhian sa mga mananagat nga nagsalig sa kadagatan sa maong barangay. (/EIM) (BANAT NEWS)