Gidasmagan sa PUJ I patay 4 angol

CEBU, Philippines - Namatay ang inahan, samtang naangol usab ang iyang anak nga nagsabak, apo, ug umagad human sila dasmagi sa PUJ sa dalan C. Padilla pasado alas 12:00 sa tungang gabii kagahapon.

Ang namatay nailhan nga si Guadalupe Yncierto, 58, nga taga sitio Lawis, barangay Alaska Mambaling, samtang ang naangol mao ang iyang anak nga si Christian Mae, 16, nga nagsabak og 6 ka bulan, ang anak niining si Mark Yogor, 2, ug ang kapuyo niini nga si Manolito Villanueva.

Sa pakighinabi sa Banat News ni City Traffic Operation Management (CITOM) Manuel Tagaan nasayran nga ang drayber sa PUJ nga si Guillermo Carzano Jr. nagmaneho sa rota nga 11A (Cebu to Inayawan) patubang sa syudad sa Sugbo.

Apan pag-abot sa maong lugar giingong kalit lang mituyok ang maong sakyanan busa nadasmagan ang mga biktima nga naglakaw sa daplin sa karsada.

Si Yncierto nga maoy nasabak dihadiha nakabsan sa kinabuhi, samtang ang mga angol niyang kabanay nadala dayon sa Cebu City Medical Center.

Samtang ang drayber kasamtangang nagtingkagol karon sa stockade sa CITOM ug nagpaabot sa kiha nga ipasaka batok kaniya sa pamilya sa mga biktima.

(BANAT NEWS)