Mag-uuma gitabanga'g patay sa silingan

CEBU, Philippines - Namatay ang usa ka mag-uuma human kini panigbasa sa amahan ug duha ka anak nga iyang kontra didto sa barangay Dumlog, siyudad sa Toledo kagahapon sa alas 6:00 sa buntag. Ang biktima mao si Semeon Siarez Edoloberio Jr, 43, minyo, nga nagpuyo sa maong lugar.

Samtang ang gitumbok nga mga suspek mao ang iyang silingan nga si Benigno Caburnay, hingkod ug duha niini ka mga bayong-bayong nga mga anak nga nagpangidaron og 16 ug 14 anyos.

 Si SPO2 Gerry Trinidad, radio operator sa Toledo City Police Station mibutyag sa Banat News nga ang biktima paingon unta kining manugway sa iyang mga kanding.

Apan pag-abot niini sa unahan sa iyang balay gisundan sa mga suspek uban sa iyang mga anak nga pulos nagbitbit og sundang ug kutsilyo.

Sumala sa kapolisan nga ang amahan nga si Benigno armado ug sundang, samtang   kutsilyo usab ug sundang ang dala sa iyang duha ka anak.

Dihang naapsan ang biktima, gihapsan dayon sa sundang sa amahan ang bukobuko niini ug dihang natumba ang biktima gidasunan dayon og tusaktusak sa kutsilyo ug sundang sa duha niya ka mga anak nga maoy hinungdan sa hinanaling kamatayon sa biktima.

Human matino nga patay na, gibiyaan sa mga suspek ang biktima ug mitahan sila sa kapolisan.

Nasayran ni SPO3 Henry Acosta nga ang kapuyo sa biktima nga si Bernadette Quimada nagkaaway ug si Merlyn Caburnay nga asawa ni Benigno sa wala pa ang hitabo.

Ang mga suspetsado nagtingkagol na karon sa prisohan sa maong dakbayan.

(BANAT NEWS)