Lola ug apo gidaro sa 10-wheeler patay

CEBU, Philippines - Namatay ang 45 anyos nga lola ug ang apo niini human sila dasmagi  sa ten wheeler truck didto sa Sitio Cangcuay barangay Tan-awan sa lungsod sa Oslob niadtong Martes sa gabii.

Ang mga biktima mao si Consolacion Trapa, 45, minyo, usa ka barangay health worker ug ang napulo pa ka buwan niyang apo nga si Hannah Nicole Berongan.

Samtang ang nakadasmag kanila mao ang 10 wheeler truck nga gipanag-iya sa Matiao Trucking nga gimaneho ni Guilberto Sido, 30, ulitawo, nga taga Basiao, kauban ang helper nga si Junel Rio, 22 anyos, ulitawo, pulos taga San Jose, San Roque Negros Oriental.

Si PO2 Rey Angelo Agustin sa Oslob Police Station mibutyag sa Banat News ang lola nga biktima nagkugos sa iyang apo kay maghipos unta sa ilang gitugway nga kanding daplin sa karsada.

Samtang ang 10 wheeler truck nga gikan sa siyudad sa Sugbo kargado sa sinakong mga feeds ug paingon sa Negros Oriental.

Apan pag-abot sa maong lugar nawad-an kini og preno busa nawad-an usab og kontrol ang drayber niini ug nasabak ang mga biktima nga diha sa maong lugar sa maong higayon.

Gidala dayon ang mga biktima sa Oslob District Hospital apan gideklarar kini nga patay na.

Samtang ang drayber ug truckboy nga nakaangkon og gamay’ng pangos mitahan sa kapolisan didto sa lungsod sa Santander ug tua sila karon itanggong samtang nagpaabot sa kiha nga isang-at batok kanila.  (BANAT NEWS)