Dolphy pagka-national artist, P.Noy di mointerbiner sa proseso sa award giving body

CEBU, Philippines - Bisan giangkon ni Presidente Benigno Aquino III nga iyang idolo ang mitaliwang Comedy King sa Pilipinas nga si Dolphy dili siya manghilabot sa proseso sa pagpili sa bag-ong hatagan og pasidungog isip National Artist sa nasud.

Ang deputy presidential spokesperson nga si Abigail Valte nagkanayon nga dili buot ang pangulo nga manghilabot sa naandang proseso sa maong pagpili.

Si Dolphy o Rodolfo Vera Quizon Sr. mitaliwan sa edad nga 83-anyos tungod sa komplikasyon sa sakit niini sa baga ug multiple organ failure niadtong Martes sa gabii sa Makati Medical Center.

Nagkadaghan ang nanawagan nga ideklarar si Dolphy nga National Artist tungod sa dakong natabang niini sa industriya ug sa pagkamaayong tawo niini bisan sa kasikatan nga naabot niini.

Ang National Commission for Culture and the Arts (NCCA), ug Cultural Center of the Philippines (CCP) maoy dunay katungod sa pagpili ug pagproseso si kinsa ang hatagan sa maong prestihiyosong pasidungog apan ang presidente sa nasud maoy mokompirmar ug motunol sa maong pasidungog.

Si Valte mibutyag nga si Communications Group Undersecretary Manolo Quezon nakigkita na sa NCCA sa miaging semana samtang buhi pa si Dolphy, mibutyag nga nominated na si Dolphy sa maong pasidungog sa Manila City Council.

Niadtong 2009 gi-nominar usab si Dolphy sa maong pasidungog apan nakapasar lang kini sa unang screening. Ang award nga mahatag sa nasud mao ang National Artist Award (Gawad Pambansang Alagad ng Sining) nga gikunsiderar nga labing taas nga pasidungog nga mahatag sa usa ka Filipino nga nakatampo og dako sa natad sa Philippine arts. (BANAT NEWS)