CEBU, Philippines - Gihimakak ni Police Regional Office-7 Regional Director Marcelo Garbo ang mikatap nga estorya nga mohawa na sa pwesto si Cebu City Police Director Melvin Buenafe tungod sa pressure sa politika.
Matud pa ni Garbo nga wala siyay nadawat nga suwat gikan ni Buenafe kalabot sa maong estorya ug giklaro lang niyang “mandatory term of office” na si Buenafe nga duha ka tuig nang nahimong city director sa CCPO.
Apan giklaro niyang adunay exemptions sa mga susama niini kung ugaling ang appointing authority momando nga ipabilin si Buenafe sa CCPO.
Mas irekomendar hinuon ni Garbo si Buenafe sa mas taas nga pwesto tungod kay angayan man kini ug dunay abilidad.
“Ideally kaya meron tayong policing ganun, you have to get out and give others a chance and prove themselves,” matud pa ni Garbo
Butyag usab ni Garbo nga angayan usab nga hatagan og higayon ang uban nga makapuli ni Buenafe kini aron sila makapakita usab sa ilang labok.
“He has given his best, given his worth and it’s about time for him to go up to a higher level, he can be a chief of staff,” pasabot pa ni Garbo.
Sa nasayran adunay migawas nga report nga naipit si Buenafe sa politika ug tungod niini mogawas siya isip city director apan ang maong balita gihimakak ni Buenafe ug gihulagway nga usa lang kini ka ‘tsismis.’ (BANAT NEWS)