CEBU, Philippines - Dili angayang estriktuhon sa mga tigpatuman sa balaod ang matang sa helmet nga sul-obon sa usa ka motorista, apan kinahanglan iimplementar gyud ang nalatid sa balaod nga magsuot gyud og helmet ang mosakay sa motorsiklo.
Kini maoy reaksiyon ni Lapulapu City Mayor Paz Radaza atol sa pakighinabi sa mga tigbalita sa press conference kagahapon sa buntag kalabot sa gikatakdang implimentasyon sa Motorcycle Helmet Act of 2009 karong Agusto 1.
Matud pa ni Radaza angayang respituhon ang maong balaod tungod kay alang man kini sa proteksiyon sa mga motorista.
Apan ang wala mauyoni sa mayor mao ang dugang gastos sa mga motorist aron lang sundon ang gipangitang brands sa helmet sa Department of Trade and Industry nga sagad kinahanglan pang paliton sa mahal nga presyo.
Samtang si Lapulapu City Police Office Director Sr. Supt. Rey Lyndon Lawas sa iyang bahin midason sa mga pamahayag ni Radaza ug mipadangat og kamanduan sa iyang mga sakop nga maghinayhinay sa implimentasyon sa maong balaod.
Matud pa ni Lawas mas maayong hatagan una og lugway ang mga motorista sa pagtuman sa maong balaod ug kahatagan og higayon sa pagpasusi sa ilang mga daang helmet ngadto sa DTI. (BANAT NEWS)