CEBU, Philippines - Mga residente sa sitio Rattan, barangay Tanke, dakbayan sa Talisay supak sa ipahigayong survey sa siyudad diha sa luna nga ilang gipuy-an nga giingong napalit na sa siyudad.
Si Nida Bacalso, 58, ug Darwin Gabisan, 20-anyos, lakip sa nangangkon nga mga sumusunod sa maong lote nga gipanag-iya sa mga Bacalso mipakita sa mapa sa lot 660 nga dunay gilapdon nga lima ka ektarya. Ang duha mipasangil nga ang maong lote gibaligya ni Atty. Marcelo Bacalso ngadto sa siyudad ug giingong silang ubang mga sumusunod wala pahibaw-a niini.
Si Nida wala moangkong paryente ang maong abogado kinsa giingong atoa na sa Amerika nagpuyo. Giingong sobra sa 20 ka mga pamilya nga sumusunod sa maong lote nga gipanag-iya pa sa ilang mga katiguwangan ang nagpuyo sa maong luna.
Gibutyag usab ni Nida ug Darwin nga duna silay gidusong reklamo ngadto sa sala ni Regional Trial Court (RTC) Judge Douglas Marigomen sa Branch 5 bahin sa maong problema.
Ang maong mga residente mibutyag nga wala silay nagunitang titulo sa maong luna gawas sa mapa niini.
Si Mayet Abarquez, hepe sa Talisay City Local Housing sa pakighinabi niini sa Banat News kagahapon mibutyag nga niadtong tuig 1998 pa napalit sa siyudad ang nahisgutang luna gikan kang Atty. Bacalso ug natitulohan na kini.
Giklaro ni Abarquez nga gihimo sa Talisay mao ang subdivision survey himuon alang sa re-blocking aron ang lugar mabutangan og klarong karsada panagana kung ugaling dunay sunog nga mahitabo dili maglisod og sulod ang bombero. Matud usab ni Abarquez nga buot lang sa siyudad nga mahan-ay ang pagkahimutang sa mga balay diha sa lugar ug walay plano ang siyudad nga papahawaon sila.
Si Abarquez midugang nga sobra sa 90 ka mga residente ang nagpuyo diha sa lugar ug mga 60 niini ang maapektohan sa buhatong karsada ug gipanghatagan na sila og pinansiyal nga tabang sa dakbayan. (BANAT NEWS)