Lola nagsaulog sa iyang ika-101 nga birthday

CEBU, Philippines - Gisaulog kagahapong adlawa ang ika-101 nga adlaw’ng natawhan sa giisip nga labing karaang babaye sa lungsod sa Minglanilla nga naila kaniadto sa mga lamian niining baligyang puto ug biko sa maong lungsod nga si “Lola Kikay.”

Si Francisca “Lola Kikay” Manacap Juezan, nga nag-edad na karon og 101-anyos nga nagpuyo sa barangay Pakigne lungsod sa Minglanilla misaysay sa Banat News nga hilabihan ang iyang kalipay nga iyang napadako ang iyang anak sa matarong.

“Naghuwat ko sa Ginoo ug kanus-a ko kuhaon, mag-ampo na lang ko sa Ginoo nga unta akong mga anak nga nakasala pasayloon na lang unta,” naghilak nga saysay ni Lola Kikay.

Matud pa niya andam na siya bisan unsang orasa kun siya kuhaon na sa Magbubuhat.

Si Lola Kikay adunay walo ka anak nga silang Dolores, Alicia, Betty, Roy, Mady, Nita, Nestor ug Marlon apan tulo niini ang namatay na usab. Ang mga anak ni Lola Kikay nga diha atol sa pakighinabi sa Banat News mihulagway kaniya nga usa ka maayong inahan ug may pagmahal ang pag-amuma niini kanila. Tungod sa pangidaron wala na mopadayon pa og baligya og puto ug biko si Lola Kikay apan uwahi siyang nakaluto niini sa milabay’ng tuig aron lang ipa-miryenda sa iyang mga anak ug apo.

Sa pagkakaron naninda pa gihapon siya og mga pagkaon ug dry goods aron duna siya buhaton ug dunay makuot nga panggastos bisan pa man nga wala siya pasagdi sa mga anak sa iyang panginahanglan. Nasayran nga naminyo si Lola Kikay sa iyang bana nga si Jesus Juezan sa wala pa moulbo ang World War II sa edad nga 14-anyos ug ang iyang bana 15-anyos usab kaniadto.

Atangi ang kinatibuk-ang estorya sa kinabuhi ni Lola Kikay dinhi sa Tingusbawan sa Banat News. (BANAT NEWS)