Senior sa Mandaue nakadawat og P1,000

CEBU, Philippines - Gisugdan na sa pagpang-apod-apod sa kagamhanan sa dakbayan sa Mandaue ang hinabang pinansiyal nga P1,000 matag usa sa 12,000 ka mga senior citizen sa maong dakbayan

Si Konsehal Jefferson Ceniza nga maoy chairman sa committee on social welfare sa konseho maoy nangulo sa pagpanghatag sa maong hinabang ngadto sa mga edaran   didto sa sports complex sa sitio Tribunal sa barangay Centro sa maong dakbayan.

Miabag kang Ceniza sa pagpanghatag niini ang pangulo sa Office of the Senior Citizen (OSCA) nga si Nedy Sienes.

Matud pa ni Ceniza nga nagplano sila nga ilang usbawan ang maong kantidad sa umaabot nga mga panahon.

Pausbawan usab nila ang hinabang pinansiyal alang sa mga Person with Disabilities (PWDs) ngadto sa P1,000 gikan sa kasamtangang P500 matag usa.

Sa Disyembre may dawatonon ang mga senior citizen nga P1,000, kay ang unang P1,000 ila namang madawat karon.

Samtang matud pa ni Sienes nga sa 14,000 ka mga rehistradong senior citizen sa dakbayan 12,000 lamang ang mi-qualify nga makadawat og P2,000.

Kini tungod kay gibase sa ilang voter’s registration certificate ang makadawat sa maong hinabang.