Dasmag ug luba namatyan sa 2 ka driver

CEBU, Philippines - Duha ka drayber ang namatay human malagpot gikan sa iyang motorsiklo ug nadunggaban sa iyang pasahero sa nagkalainlaing lugar sa Metro Cebu sa miaging adlaw.

Ang mga biktima mao sila si Norman Benajeras, 36, minyo nga taga Tagbilaran, Bohol apan temporaryong nagpuyo sa Consolacion, ug Diosdado Azucena Escultor, 30 nga taga C. Padilla street, barangay Duljo-Fatima dakbayan sa Sugbo.

Si Benajeras nagmaneho sa iyang motorsiklo paingon sa Consolacion gikan sa dakbayan sa Sugbo dihang sa pag-abot niini sa barangay Guizo, dakbayan sa Mandaue   kalit kining nakadasmag og iro.

Gumikan sa kakusog sa iyang pagpadagan, nalagpot siya gikan sa iyang motorsiklo ug sa pagtugpa sa sementadong karsada nabuak ang iyang helmet ug siya namatay.

Samtang si Escultor giingong nasuko sa iyang pasahero nga si Allan Saldua gumikan kay P9 ray giplite.

Nagkalalis ang duha kay nasuko man ang suspek dihang gipaningil sa kuwang niya sa plite busa nasuko usab ang biktima.

Ang ilang panaglalis, nahunong dihang miduol ang usa ka higala sa biktima.

Nanaog ang suspetsado samtang may misakay na usab nga laing pasahero ang biktima nga may kargamento.

Dihang nagsakwat sa duha ka sakong karga sa iyang pasahero ang biktima,    kalit nga giluba sa suspetsado ang buko-buko niini nga maoy hinungdan sa iyang kamatayon.

Sa pagkakaron gipangita pa sa kapolisan ang suspetsado kinsa nakasibat human sa maong hitabo. (BANAT NEWS)