Binay, Enrile ug Erap mobisita sa Danao

CEBU, Philippines - Human gibisita ni Presidente Benigno Aquino III si Bise Mayor Ramon “Nito” Durano III, si Bise Presidente Jejomar Binay na usab ang mobisita kang Mayor Ramon “Boy” Durano Jr. sunod semana sa dakbayan sa Danao.

Gipahibawo ni Durano nga kauban ni Binay sa pagbisita karong Hulyo 20 sila si Senate President Juan Ponce Enrile ug anak nga si Kong. Jack Enrile; kanhi Presidente Joseph Estrada ug anak nga si Kong. JV Ejercito. Si Mayor Durano nakigkita kang Gob. Gwendolyn Garcia kagahapon aron ipahibawo ang pag-abot sa iyang mga bisita. Ang bisitahan ni Binay ug kaubanan mao ang Cebu Mitsumi nga adunay 25,000 ka mga empleyado ug ang merkado publiko sa dakbayan sa Danao ug pagkahuman motambong sila sa State of the Province Address (SOPA) ni Garcia diha sa Cebu International Convention Center.

Ang magsuong Durano nagkasungi karon sa politika gani bag-ohay lang mitapon si Nito sa Liberal Party atol sa iyang adlaw’ng natawhan niadtong Sabado nga gitambongan ni Aquino.

Si Boy ug Nito kauban sa Barug Alang sa Kauswagan ug Demokrasya (Bakud) Party sa wala pa sila magkasungi samtang ang ilang kaatbang ang lain nilang igsuon nga si kanhi Mayor Jesus “Don” Durano.  (BANAT NEWS)