CEBU, Philippines - Wala kaugpo ang usa ka barangay kagawad human gikatahong nasakpan sa aktong nag-atiman sa iyang mga tinanom nga marijuana diha sa bukirong bahin sa barangay Patong sa lungsod sa Badian niadtong miaging Sabado sa mga sakop sa Regional Mobile Group (RMG-7).
Ang nasikop mao si Domingo Amorado Besin, molupyo sa barangay Patong sa nahisgutang lungsod ug kasamtangang konsehal sa maong barangay.
Sa pakighinabi sa Banat News ni Sr. Insp. Roland Aliser, usa sa mga team leader sa maong operasyon mibutyag nga nakadawat sila og impormasyon bahin sa naghitak nga tanom nga marijuana sa nahisgutang dapit.
Matud pang Aliser nga ang grupo ni Insp. Ryan Orapa maoy nakaakto kang Besin samtang giingong nag-atiman sa mga tanom nga marijuana ug wala na kini makadagan pa sa pagbutho sa mga polis.
Gawas sa barangay Patong nakaibot usab og mga marijuana sa sitio Butong barangay Basyaw ug Domingo na sila sa hapon nakabalik dala ang gibanabanang 10 mil ka punoan sa marijuana.
Gibanabana ni Aliser nga mokabat sa P3 milyones ang kantidad sa mga marijuana kun kini mauga na. Kasong Republic Act 9165 ang kasong ipasaka batok ni Besin bisan paman sa paghimakak niini sa maong pasangil. (BANAT NEWS)