Hulyo 10

1934 Con-Con

1934— Mibotar ang mga Filipino og 202 ka mga delegado alang sa constitutional convention aron paghimo sa Philippine Constitution. Ang Constitutional Convention pinangulohan ni Claro M. Recto niadtong 1934 maoy nahimong sumbanan ug framework sa 1935 Commonwealth Constitution nga giaprubahan kaniadto sa pangulo sa US nga si Presidente Franklin Roosevelt niadtong Marso 23, 1935. Giingong ang 1935 Constitution mao ang labing maayong Philippine charter nga gisunod gikan sa Amerika gawas lang sa unicameral legislature ug ang pagka-unitary nga sistema sa panggobiyerno niini imbes nga federal system. Ang nagpreparar sa draft niini mao sila si Filemon Sotto, chairman, and Norberto Romualdez, Manuel Roxas, Vicente Singson Encarnacion, Manuel C. Briones, Miguel Cuaderno,ug Conrado Benitez kinsa maoy mihulip ni Jose P. Laurel, sila gitawag kaniadtong “Seven Wise Men.”

Monkey Trial

1925— Gihusay ang gitawag kaniadtong “Scopes monkey trial” sa Dayton, Tennessee sa US nga milanat og 12 ka adlaw. Usa ka magtutudlo nga si John Scopes ang gipasakaan og kaso tungod sa paglapas sa Butler Act. Ang maong balaod nga bag-ohay pa lang gipasar nianang tuiga nagdili kaniadto sa pagtudlo diha sa mga pangpublikong tunghaan ang leksyon kabahin sa “evolution” sa tawo nga gibase sa teoriya ni Charles Darwin nga nag-ingon ang tawo gikan sa ape (unggoy). Apan si Scopes gisuportahan sa American Civil Liberties Union. Ang husay sa kaso gihimo aron hagiton ang legalidad sa Butler Act, ang mga lokal nga mga opisyales sa maong lungsod nga buot mosikat pinaagi sa publisidad sa maong husay mikuha ni Scope aron mahagit ang maong balaod. Nakombikto si Scope niadtong Hulyo 25,1925 ug gipamulta og $100, apan sa ilang pag-apelar sa Korte Suprema gi-acquit si Scope tungod sa teknikalidad nga kini sobra ra kaayo ang multang gipahamtang kaniya, apan gibarugan sa Korte Suprema nga legal gyud ang Butler Act. (BANAT NEWS)