CEBU, Philippines - Giklaro ni Mayor Michael Rama nga wala siya mahiubos sa kadagkoan sa Liberal Party (LP) nga wala siya imbitara niini atol sa panag-alyansa sa Bakud Party ug LP sa miaging Sabado didto sa dakbayan sa Danao.
Kini sa dihang ang lig-on niyang kontra sa politika nga sila si Kongresista Tomas Osmeña, Konsehal Margot Osmeña, Bise Mayor Joy Augustus Young ug Konsehal Yayoy Alcoseba abtik kaayong mitambong sa maong kalihokan.
Matud pa ni Rama nga iyang girespetohan ang hukom sa LP nga wala modapit kaniya kay alang kaniya alang man sa mga opisyal sa lalawigan ug dili alang sa taga dakbayan sa Sugbo ang maong kalihokan. Subli usab niya nga gipahibalo nga magpabilin gihapon siya sa LP ug andam siyang motuman sa iyang mga obligasyon sa maong partido sama sa pagbayad sa binuwan nga membership fee.
Dugang pa sa mayor nga wala siya makahinumdom nga may nalapas siyang mga lagda sa partido sukad pa kaniadto.
Kahinumdoman nga gawas sa LP, pipila sa mga sakop sa Team Rama sakop usab sa Partido Demokratiko Pilipino-Lakas ng Bayan (PDP-Laban) ug usa niini mao si kanhi kongresista sa South District Antonio Cuenco kinsa magpapili pagbalik sa umaabot nga eleksyon.
Ang campaign manager usab ni Rama nga si Konsehal Joey Daluz sakop usab sa PDP-Laban apan gitin-aw sa mayor nga dili kini makaapektar kaniya isip loyal nga sakop sa LP.
Gihangop usab ni Rama ang desisyon ni Cuenco sa pagsagop sa PDP-Laban ug andam na kini nga mobalhin sa maong partido.
Matud pa sa mayor nga nagpabilin siya nga loyal ngadto sa usa sa mga lider sa LP nga si Presidente Noynoy Aquino apan sa samang higayon suod usab niya nga higala ang lider sa PDP-Laban nga si Bise Presidente Jejomar Binay. (BANAT NEWS)