Driver namatay sud sa taxi

CEBU, Philippines - Patay na nga nadiskobrehan ang usa ka drayber sa taxi nga gituohang giatake sa high blood sa sulod sa gimaneho niining taxi nga gi-parking sa daplin sa dalan sa sitio Basak Merkado sa barangay Basak, dakbayan sa Lapulapu kagahapon sa alas 6:00 sa buntag.

Ang namatay mao si Fabiano Pelayri, 41, minyo, nga taga dalan 537 A. Tormes sa dakbayan sa Sugbo ug nagmaneho sa taxi nga nagdala sa plate number GXP 567.

Si PO2 Winston Ybanez sa homicide section sa kapolisan sa maong dapit nga nahinabi sa Banat News miingon nga nasigpatan ang taxi nga gimaneho sa namatay nga migawas sa Collinwood Subdivision sa barangay Basak ug mipahiluna kini sa daplin sa dalan kagahapon sa kaadlawon.

Dugang pa niya nga usa ka Sammy Antig nga nagpuyo sa maong dapit nga nahiagi sa maong lugar kagahapon sa alas 6:00 sa buntag maoy nakalili sa maong drayber nga wala na magginhawa.

Busa dali nga gipahibalo ni Antig ang pipila ka mga tawo sa maong dapit ug ingon man ang kapolisan.

Si PO2 Ybanez miingon nga gihatud nila kini sa Mactan Doctor’s Hospital apan gideklarar kini nga patay na sa paghiabot didto.

Ang mga nakasaksi nagkanayon nga malagmit giatake sa altapresyon o kaha sakit sa kasingkasing ang maong drayber apan gisugyot sa kapolisan ngadto sa kabanay   nga ipa-autopsy kini sa pagsuta sa tinuod nga hinungdan sa iyang kamatayon.

Samtang naangol ang usa ka ulitawo human kini pusila sa managsoon nga iyang silingan didto sa sitio Tabok-Kamalig, sa barangay Tabok, dakbayan sa Danao kagahapon sa kaadlawon.

Ang biktima giila nga si Edgar Condevillamar, 21, ulitawo, nga taga sitio Upland, barangay Taytay, sa maong dakbayan samtang ang mga suspetsado mao ang managsoong Roldan ug Bonnet Inojales, pulos hingkod.

Si SPO4 Edgar Gomez sa Danao City Police Station mibutyag nga naglakaw sa karsada ang biktima paingon sa ilang balay dihang kalit kining giluthang sa managsoong suspetsado kinsa nagsakay og motorsiklo sa maong higayon.

Samdan sa hawak ang biktima ug nahatud dayon kini ngadto sa Vicente Sotto Memorial Medical Center sa dakbayan sa Sugbo.

Gipangita pa sa kapolisan ang mga suspetsado aron masuta ang hinungdan sa maong pagpamusil. (BANAT NEWS)