CCTV camera giinstalar sa dalan sa Carcar

CEBU, Philippines - Gipamutangan na og mga CCTV camera ang mga kadalanan ug tibuok palibot sa dakbayan sa Carcar aron mapakgang ang mga kriminal ug ubang mga sakop sa mga grupo sa fraternity sa paghimo og krimen. Gibutyag ni Carcar City Mayor Nicepuro Apura sa Banat News nga may 18 ka mga CCTV camera ang ilang gipanaud sa mga nagkalainlaing lugar sa siyudad nga sagad mahitaboan sa krimen.

Kasagaran sa mga gipanaoran og camera mga   hugopanan sa daghang tawo diin anha magsugod ang kalambora nga usahay mosangpot sa pinatyanay.

Matud pa ni Apura nga pinaagi niining mga camera sayon ra ilhon ang mga magpasiugda sa krimen kay anaa may camera nga morekord sa maayo ug dautan nilang buhat.

Hinuon kadtong mga kriminal nga makaamgo nga masayran ang ilang dautang buhat sa lugar nga adunay  camera, magpanaga na sila sa paghimo og krimen niini, sumala ni Apura.

Matud sa mayor sa Carcar nga migasto og P700 mil ang dakbayan pagpamalit sa maong mga CCTV camera nga bag-ohay lang nahuman og estalar sa kadalanan gikan sa Plaza Rotunda sa Poblacion hangtud sa   barangay Awayan sa maong siyudad.

Niadtong miaging mga buwan gihasi og sunod sunod nga krimen ang dakbayan sa Carcar nga naglambigit sa panagsungi sa nagkaribal nga mga grupo sa fraternity.

Apan kasagaran niini wala masulbad hangtod karon, matud pa sa mayor.

Gani usa sa nabiktima sa krimen mao ang anak ni Mayor Apura nga si Carl Vinson Apura nga sakop sa Akrho kinsa gipusil atol sa live band concert didto sa barangay Valladolid niadtong miaging buwan. (BANAT NEWS)