Lapulapu City mopasaka og kaso vs tag-iya sa barko

CEBU, Philippines - Mibahad si Lapulapu City Mayor Paz Radaza nga mopasaka og kaso batok sa tag-iya sa barkong nalunod sa kadagatan sa dakbayan sa Lapulapu kung mapakyas kini sa pagkuha sa barko sa labing daling panahon.

Kini maoy unod sa suwat demanda nga gipadangat ni Radaza ngadto sa presidente sa M/V B&E Uno nga nalunod niadtong Hulyo 1 sa Brgy. Canjulao nga may kargang 23 mil ka sakong semento.

Matud pa ni Radaza ang pagkatap sa lana ug ang pagkahilis sa sinakong semento ilawom sa dagat posibleng makadaot sa kinaiyahan ilawon sa dagat.

Kasagaran sa nanimuyo sa maong dapit ug sa kasikbit nga barangay pulos pangisda ug panginhas ang panginabuhi.

Gumikan niini si Mayor Radaza mihangyo ngadto ni Benjamin Go (tag-iya ug presidente maong kompanya) nga himuon ang tanan sa pagkuha ug pagpalutaw balik sa maong barko sa labing daling panahon aron dili maapektuhan ang kinaiyahan ilawom sa kadagatan sa Mactan.

Ang mga sakop sa Philippine Coast Guard wala pay nakitang oil spill sa maong dapit apan gibutangan na nila kining daan ang palibot sa nalunoran sa barko og oil spill boom aron mapugngan ang pagkatag niini kun moawas ang krudo. (BANAT NEWS)