"Kawatan" napusilan patay

CEBU, Philippines - Patay ang usa ka gidudahang kawatan human kini giingong misuway unta og dunggab sa gwardiya pasado alas-7 kagahapon sa buntag sulod sa gibantayan niining gidemolis nga nasunog nga Gaisano Capital sa eskina dalan Colon ug Leon Kilat sa barangay Kalubihan ning dakbayan.

Ang napusilan giila sa kapolisan nga si Rodrigo Teaño Fernandez, usa ka traysikad driver nga taga Garfield St. sa barangay Suba ning dakbayan kinsa nakaangkon og samad pinusilan sa dughan human gikatahong misuway og dunggab sa gwardiyang mibabag kaniya.

Kasamtangang gikostudiya sa kapolisan ang gwardiyang si Marjon Quimco Manriquez, 25, sakop sa Saint Michael Security Agency nga maoy nagbantay sa maong demolition site.

Sa pakighinabi sa Banat News ni Manriquez, kini misaysay nga ang iyang napusilan ug usa ka kaubang lalaki ang nanuktok kini sa gate maong iyaha kining giablihan.

Gikatahong mihangyo ang duha nga mosulod tungod kay trabahante sila sa nag-demolis sa maong building apan dihang iyaha kining gipangitaan og identification card milahos kini ug ang kauban og sulod.

Dihang iyahang gibabagan, nagbulag dayon ang duha og lakaw padulong sa basement hinungdan nga iyaha kining gimandoan nga pagawson.

“Ayaw mo diri bay kay mao ni tugon sa tag-iya panggawas nalang mo,” matud pa ni Manriquez ngadto sa duha.

Apan imbes nga mopatuo sa mibabag nga si Manriquez giingong giduol siya ni Fernandez ug miaksyon og dunggab hinungdan nga iyaha kining napusilan.

“Nagbuwag buwag sila og agi, mao to ang usa akong gisugat sa pikas ug akong giingnan nga bay gawas nalang lagi. Mao to mikuha siya og kutsilyo misuway og dunggab nako, ako nalang pud gipusil,” matud pa ni Manriquez

Sumala pa ni Manriquez bisan naigo na si Fernandez midasmag gihapon kini kaniya duha ka higayon hinungdan nga giusban niya kini og pusil.

Nagduda si Manriquez nga posibleng mangawat ang duha tungod kay dili sila mga trabahante sa nagdemolis sa maong building.

“Naa koy pagmahay gamay, (pero) og wala pud to nako buhata ako man pud maoy mamatay,” saysay pa ni Manriquez kinsa boluntaryong mitahan sa iyang kaugalingon ngadto sa kapolisan.

Nakuha sa crime scene mao ang usa ka kabhang sa kalibre .45 nga maoy gigamit sa gwardiya pagpusil, usa ka buhing bala sa susama gihapong armas, usa ka kutsilyo nga giingong gipanag-iya sa biktima.

Ang mga imbestigador pinangulohan ni SPO4 Rey Cuyos padayon pang nag-imbestigar sa maong kaso ug misusi sa mga alegasyon sa gwardiya. (/EIM)(BANAT NEWS)