Hubog nga magmaneho

CEBU, Philippines - Dugay nang gidili sa lagda sa trapiko ug sa Land Transportation Office ang pagmanehong hubog bisan unsang matang sa ilimnong makahubog – apil na ang beer ug ubang matang sa alak bisan tuba.

Apan ang rekord nagpakita nga wala kaayo kini na patuman sa mga road law enforcers tungod kay hilabihan kahasol sa pagpatuman niining maong lagda.

Ubos sa bag-ong lagda nga giisyu sa Department of Transportation and Communications (DOTC) – diin ang LTO usa sa mga ahensya sa kagamhanan nga sakop niini – multahan og P5,000 kadtong magmaneho og sakyanan nga hubog.

Apan ang usa ka road law enforcer, sama sa mga LTO agents ug mga traffic policemen, dili maoy tukma nga tawo nga moingon nga hubog o ubos sa gahom sa ilimnong makahubog ang maong drayber.

Usa ka nurse sa Cebu City Medical Center (CCMC) mitug-an sa Banat Manobela nga kasagaran sa mga drayber nga makasugat og aksidente, ilabi na sa lawom nga gabii ug kaadlawon, mga nakainom gyud og ilimnon nga makahubog.

Matud ni Fulton Lunod, usa ka LTO deputized agent, nga mailhan dayon gikan pa lang sa baho sa ilang baba ang mga drayber nga nakainom og bino o alak.

Aron mas mapadali ang liquor testing sa mga malapasong drayber gisugyot ni Fulton nga unta aduna gyu’y breath analyzer, usa ka himan nga makadeterminar kun ang usa ka tawo nakainom ba og ilimnong makahubog.

Ang Banat Manobela nakighinabi og pipila ka tawo kabahin niining maong isyu apan bisan ang usa ka polis nga nadestino dinhi sa dakbayan miangkon nga lisud kini ipatuman kay bisan sila adunay higayon nga nakainom sila apan kinahanglang momaneho sa ilang sakyanan.

Una, dili mahimong parahon lang ang sakyanan nga magdagan sa karsada og sutaon kun nakainom ba ang drayber, gawas lang niadtong malambigit og aksidente nga adunay moreklamo.

Gawas pa niini, napanglantawang makamugna kini og gubot ilabi na kun gabii kini ipatuman tungod kay mao may oras usab sa mga ting-inom sa mga tawo. (BANAT NEWS)