Supply sa kuryente di kabalaka

CEBU, Philippines - Ang Department of Energy (DOE) 7 mipasalig nga ang siyudad sa Sugbo ug ubang bahin sa Central Visayas makabaton og igong suplay sa kuryente sa umaabot nga duha hangtod sa tulo ka tuig.

Kini agi og tubag sa kabalaka nga gipalanog ni Senior Vice President and Chief Operating Officer sa Visayan Electric Company (VECO) Sebastian Lacson kalabot sa giingon niya nga basin motumaw unya ang brownout tungod sa kakuwang sa suplay sa kuryente.

Apan matud pa ni Lacson nga tungod sa pasalig sa DOE nawagtang ang iyang kabalaka ug ingon man sa publiko kalabot sa kahimtang sa suplay sa kuryente sa rehiyon.

Sayo niini si DOE Engr. Antonio Labios maoy mihatag og kasigurohan nga ang suplay sa kuryente sa Sugbo magpabilin sa maayong kahimtang hangtod sa tuig 2015 .

Hinuon matud pa ni Labios nga ang Sugbo ug ubang dapit sa Central Visayas nagkinahanglan og dugang power plant aron mapanubagan niini ang nagsaka nga panginahanglan sa mitubong mga negosyo dinhi uban sa nagkadaghan nga populasyon.

Midugang siya nga mahimong dili anhi mismo itukod sa lalawigan sa Sugbo ang dugang planta sa kuryente basta sulod lang sa Central Visayas.

Si Energy Undersecretary Josefina Patricia Magpale –Asirit sa iyang pagbisita sa Sugbo sa miaging adlaw mibutyag nga ang grid sa Central Visayas adunay kinatibuk-ang 83 megawatt(MW) surplus sa kapasidad nga 1,843 ka MW tungod sa 610 MW nga gidugang niini sa miaging      tuig.

Hinuon sa DOE Power Development Plan, ang grid sa rehiyon 7 nagkinahanglan og 100 MW nga dugang suplay sa kuryente sa tuig 2015 ug nga matud pa ni Asirit nga wala nay angay kabalak-an ang mga molupyo dinhi sa rehiyon. (/WC) (BANAT NEWS)