Tawo gisud sa sako gitambog sa dagat

CEBU, Philippines - Usa ka nagsugod na og kadugta nga patay’ng lawas sa usa ka lalaki nga gisulod og sako ang napalgan sa usa ka mananagat diha sa kadagatan sa Tañon Straight sa barangay Lambog sa lungsod sa Badian kagahapon sa alas 10:10 sa buntag.

Ang kapolisan mibutyag nga giila sa mga kabanay ang biktima nga mao si Carmelo Caputol, 46, way klarung trabaho nga nagpuyo sa barangay Poblacion sa samang lungsod.

Usa ka Agaton Tejada, 45, nga nagpuyo ra sa maong lugar ug usa ka mananagat maoy nakakaplag sa maong sako nga naglutaw sa dagat ug dihang iyang gisusi tawo ang sulod niini.

Matud ni PO2 William Beltran sa Badian Police Station dihang nahinabi sa Banat News migimaw ang kamot sa tawo diha sa sako samtang kini gihampak sa balod hinungdan nga iyaha kining gihiktan og pisi ug giguyod padulong sa baybayon.

Daling gi-report ni Tejada sa kapulisan ang maong patay’ng lawas, ug ang mga sakop sa rural health unit sa lungsod uban sa mga imbestigador mao nay midala niini sa punerarya sa lungsod, paglabay sa kapin usa ka oras usa ka nagpailang igsuon niini maoy miila sa biktima.

Atol sa imbistigasyon sa kapulisan nasuta nga dunay dakung samad sa agtang ang biktima nga gituohang agi sa pagbunal og gahi nga butang ug maoy gituohang hinungdan sa kamatayon niini.

Matud pa sa mga kabanay katapusang nakit-an ang biktima lima ka adlaw na ang nilabay nga nakig-inom sa mga barkada sa usa ka tindahan sa maong lugar. Sa paghimo ning balita padayon pa ang imbestigasyon sa kapulisan ug gisubay sa imbestigasyon si kinsa ang katapusang mga gikauban sa biktima aron kakuhaan og dugang inpormasyon kabahin sa kamatayun niini. (BANAT NEWS)