Way pakabana

CEBU, Philippines - Local officials sa Agusan del Sur gelatos ni P.Noy.

Nakatilaw og latos ang mga lokal nga opisyales sa Agusan del Sur didto sa Mindanao tungod sa wala nila pagseryoso sa kamandoan ni Presidente Benigno Aquino III kabahin sa kampanya kontra illegal logging.

Si Aquino kinsa maoy pinasidunggang dinapit sa pagsaulog ni Bise Mayor Ramon “Nito” Durano III sa iyang ika-64 nga birthday mibutyag nga dihang mibisita siya sa usa ka probinsya sa Mindanao naghitak gyud ang pagpamutol og mga troso (kahoy).

Ang gipamutol nga kahoy anha palutawon sa mga kasapaan aron ipaanod paubos apan dihang mibundak ang kusog kaayong uwan sa maong probinsya nabanlas ang tinapok nga troso ug gidaro ang tanang mga proyekto ug imprastraktura sa gobiyerno sama sa taytayan ug uban pa.

Si Aquino nahibulong kung unsay gibuhat sa mga lokal nga opisyales nganong wala gyud maputol ang maong mga binuang.

Matud ni Aquino nakita niyang dili seryoso ang unom ka mayor sa ilang trabaho maong gipa-esplikar niya kini, samtang usa ka city police director, usa ka provincial police director ug unom ka mga police chiefs sa maong probinsya ang gipangrelibohan tungod kay dili sila kwalipikado sa ilang mga trabaho.

“Di nila ako siniseryoso, hinahamon nila ako kaya di bababa sa anim na mayor ang binigyan po ng show cost order, ni- relieve po ang isang provincial director, isang city director at anim na chiefs of police dahil kung sila po’y gumagawa sa trabaho nila mukha pong di sila qualified dahil ang mata nila’y napakahina na,” ni Aquino pa, nga nagpasabot daw ‘buta’ sila sa mga panghitabo sa ilang palibot.

Gawas niini 31 ka mga opisyal sa Department of Environment and Natural Resources (DENR) ang gipangtangtang sa katungdanan tungod sa wala magpakabana sa ilang trabaho.

Sa laing bahin, si Department of Interior and Local Government secretary Jessie Robredo mibutyag nga ang lugar nga gihisgutan sa presidente mao ang Agusan del Sur.

Matud ni Robredo sugod pa lang kini sa seryosong kampanya sa administrasyon batok sa mga opisyal nga dili moseryoso sa pagserbisyo.

Kahinumdoman nga niadtong Disyembre 2010 gibanlas ngadto sa dagat ang Cagayan de Oro City ug Iligan City sa Mindanao og flashflood nga mikalas og dul-an usa ka libo ka tawo ug gatosan ang na-missing, ang mga survivors miingon nga mga dagkong pinutol nga mga troso ang miligis sa ilang kabalayan gikan sa bukid. (BANAT NEWS)