Metrohan sa veco ilisan

CEBU, Philippines - Ang Visayan Electric Company (VECO) nagplano nga ilisan na ang mga electro mechanical (analog) meters ngadto na sa electronic meters alang sa tanang residential consumers.

Ang maong plano na-aprobahan na sa Energy Regulatory Commission (ERC) ug ang VECO naa na sa proseso sa pagpili sa labing maayong electronic meter nga gamiton.

“It’s has been approved by ERC already and what we’re doing now is that we are selecting the best electronic meter possible to be used for the implementation of this plan that will be out soon,” matud pa ni Engr. John Lex James Canoy, ang power metering services officer-in-charge sa VECO

Ang maong electronic meters parehas ra sa mga gipanggamit karon sa mga industrial ug commercial consumers nga mas daling basahon ug dili usab ma-tamper tungod kay moalarma kini kung hilabtan.

Giklaro hinuon ni Canoy nga dili kini parehas sa smart meters nga ilang giplanohang ipatuman kay basic metering gihapon kini nga kinahanglang dunay meter readers nga moadto sa mga kabalayan.

Ang smart meter konektado sa internet ug mabasa sa VECO ang konsumo online ug pinaagi gihapon niini mahimo nilang putlan og kuryente ang wala makabayad. (BANAT NEWS)