Nanganak og upat

CEBU, Philippines - Usa ka 38-anyos nga ginang gikan sa bukirang barangay sa lungsod sa Argao ang giingong nanganak og duha ka babaye ug duha ka lalaki (quadruplets) ka masuso niadtong Huwebes.

Ang nahisgutang quadruplets padayong gi-monitor sa mga doktor sa Vicente Sotto Memorial Medical Center tungod kay sila gipanganak kapin pito pa lang ka buwan.

Sukad kagahapon, usa sa maong mga puya ang anaa pa sa Emergency Room (ER) samtang ang ubang mga kaluha niini gisulod sa Intensive Care Unit (ICU) tungod kay nagkinahanglan pa kini og apparatus aron makaginhawa.

Ang mga ginikanan sa quadruplets mao sila si Ernesto Omaya, 43, ug Marilyn Omaya, mga residente sa sitio Malacorong, barangay Usmad, Argao. Si Ernesto nagtrabaho sa coal mine sa barangay Linot-od sa nahisgutang lungsod ug ang kita niini maoy gibuhi sa laing tulo nila ka mga anak nga mga maguwang sa quadruplets.

Ang tulo nagtungha og grade one, grade three ug third year high school sa Argao. Ang kagawad sa barangay nga si Flaviano Dayaganon mibutyag nga ang barangay mihatag og bugas ngadto sa pamilya isip tabang. Matud usab ni Dayaganon nahibaw-an lang nga quadruplets ang ipanganak sa ginang dihang gihimugso niini ang unang bata didto sa Argao apan nahibulong ang mga midwife ug doktor nga duna pay sulod ang tiyan niini maong gidali kini pagdala sa VSMMC.

Si Dayaganon nagkanayon nga ang magtiayong Omaya nagkinahanglan gyud og tabang, gani niadtong Miyerkules wala sila’y mga kwarta dihang midangop sa tambalanan. Si Ernesto nagkinahanglan og gatas sa mga puya tungod kay walay gatas nga mogawas sa ilang inahan, wala usab silay kwarta alang sa ilang pagkaon samtang anaa pa sila sa tambalanan ingon man ikapalit og mga tambal nga gikinahanglan sa mga puya.

Nagproblema usab si Ernesto tungod kay giingong wala siya mapakitang medical abstract nga rekisitong gipangayo sa Kapitolyo ug Department of Social Welfare and Development aron mahatagan sila og hinabang tungod kay normal man ang pagpanganak sa iyang asawa. Tungod sa ilang kahimtang diha sa tambalanan nag-apura nang mouli ang inahan ug ibilin lang una ang quadruplets sa tambalanan.

Ang social workers sa DOH diha sa VSMMC nagkanayon nga wala sila’y stock sa ubang mga tambal nga gikinahanglan sa mga puya. Hinuon dunay mga social workers nga mihatag na sa ilang personal nga kuwarta alang sa pagkaon sa magtiayon.

Si Fe Camilio, social worker sa DOH nagkanayon nga gi-refer nila ang pasyente nga mangayo og tabang ngadto sa Kapitolyo ug sa DSWD ilabi na sa mga tambal nga wala kanila. (BANAT NEWS)