2 polis nangulata og sikyu nga 'nangmolestiya' girelibohan

CEBU, Philippines - Girelibohan na kagahapon sa hapon gikan sa mga police station nga ilang nadestinohan ang duha ka mga polis sa dakbayan sa Lapulapu kinsa gipasanginlang nangulata sa usa ka security officer sa usa ka mall sa maong siyudad.

Si Sr. Supt. Rey Lyndon Lawas, hepe sa Lapu-Lapu City Police Office (LCPO) mibutyag sa Banat News nga girelibohan sila si Sr. Insp. William Jumoc, hepe sa station 5 ug si PO2 Juan Philip Delima nga nadestino sa station 4 sugod kagahapon sa hapon.

Si Jumoc ug Delima ang temporaryong gipangdestino sa Personnel Holding Administrative Unit (PHAU) sa LCPO samtang gipaubos pa sila sa imbestigasyon kalabot sa reklamo sa maong gwardiya.

Ang security officer nga si Roger Mangcao kinsa gitanggong usab sa karsel tungod sa giingong pagpanghinol niini sa 15-anyos nga gikatahong ilang nadakpan tungod sa pagpangawat sa maong mall mipasangil nga gikulata siya sa maong mga polis nga misikop kaniya. Matud ni Lawas sa Banat News nga ang bata mihimakak sa pasangil batok kaniya ug giingong igo lang kining mi-testing sa perfume nga baligya sa mall ug dihadiha gisikop siya sa gwardiya.

Ang bata matud pa mipasangil nga gidala siya ngadto sa buhatan sa mga gwardiya ug gipugos og papirma nga dili na mousab sa iyang gibuhat (giingong pangawat) dayon gisiradohan ang pultahan sa buhatan ug giingong gimolestiya ni Mangcao.

Human buhii misumbong sa iyang uyoan nga si Jumoc kinsa nakig-coordinate ngadto sa station 4 maong gikuyogan siya ni Delima sa mall ug gidakop si Mangcao apan nagmagahi kini nga dili magpaposas.

Kagahapon sa hapon si Mangcao gipasakaan na og kasong acts of lasciviousness ug resisting arrest.

Si Lawas nagkanayon nga ang abogado ni Mangcao nga si Atty. Inocencio dela Cerna miluwat og letter complaint batok kang Jumoc ug Delima.

Ang mga polis kusganon hinuong mihimakak sa pasangil diha sa report sa TV Patrol Central Visayas kagahapon. (BANATNEWS)