Gipatay gitambog sa atabay

CEBU, Philippines - Usa ka 14- anyos nga dalagita ug 2nd year high school ang gituohang gilugos ug pagkahuman gipatay dayon gihagbong ang hubo niining lawas sa giabandonar nga atabay sa bukirang bahin sa sitio Dalenson sa barangay Tigbawan sa lungsod sa Tabuelan kagahapon sa alas 8:00 pasado sa buntag.

Apan gituohan sa mga imbestigador nga nahitabo ang krimen niadto pang Huwebes sa gabii dihang wala na makauli sa ilang pinuy-anan ang biktima gikan sa klase niini pagkahapon.

Ang biktima 14-anyos (pangalan gipugngan sa Banat News) tinun-an sa 2nd year high school sa usa sa mga pangpublikong tunghaan sa lungsod sa San Remegio apan residente sa lungsod sa Tabuelan.

Matud ni Insp. Roberto Hugo ang hepe sa Tabuelan Police nga nahinabi sa Banat News napalgan sa mga kabanay ang hubo na ang ibabaw nga bahin sa lawas sa biktima nga nagtikungkong ilawom sa gi-abandonar nga atabay.

Giingong aduna kini daghang mga samad sa kalawasan ug gidudahan usab nga gilugos una pa kini gipatay, apan kini sutaon pa sa kapolisan pinaagi sa awtopsiya.

Base sa nakuhang impormasyon sa kapolisan sa mga kabanay sa biktima Huwebes sa hapon pa kining na-missing. Ang 61-anyos nga amahan sa biktima nagabin-an na lang og pinaabot kaniya ug bisan ang mga classmate niini wala usab masayod kun asa kini napunta.

Matud ni Hugo tibuok gabii niadtong Huwebes nagtinabangay og pangita ang mga kabanay uban ang mga tanod sa barangay sa biktima ug gisiksik nila ang tanang mga mingaw nga lugar apil na ang mga langob sa ilang dapit apan wala kini makit-i.

Hangtud nga naabot sila sa giabandonar nga atabay ug diha nila kini makit-i, giingong patay na kini ug nag shorts na lang.

Matud ni PO2 Gilbert Allego sa Tabuelan Police Station nga nahinabi sa Banat News kamanghurang anak sa unom ka magsuon ang biktima.

Sa paghimo ning balita kasamtangang gihaya ang patay’ng lawas sa biktima sa punerarya didto sa maong lungsod samtang gipaabot pa si Dr. Nestor Satur sa PNP Crime Laboratory aron moawtopsiya sa patay’ng lawas. (/EIM)  (BANATNEWS)