Pagtanom og citronella gidasig

CEBU, Philippines - Karon nga nagkalapad na ang merkado sa citronella oil, ang kagamhanan sa lungsod sa Boljoon mipadasig sa ilang mga mag-uuma sa pagtanom og citronella grass, usa ka matang sa sagbot nga susama sa pamilya sa tangad, isip laing matang sa panginabuhian gawas sa pagpanguma.

Ang Citronella oil maoy usa sa 20 ka mga gi-intra   nga produkto nga gipresentar sa bag-ohay lamang nga nahuman nga Obra Negosyo Eskwela Countryside Enterprise and Business Upliftment (ONE CEBU) program ni Governor Gwendolyn Garcia inabagan sa Mandaue Chamber of Commerce, mga sumasalmot nga local government unit ug akademya.

 Ang maong produkto milangkat sa ikatulong dapit sa nahisgutang kompetisyon.

Si Acer Medida, ang negosyante sa Citronella Oil nagkanayon nga ang Obra Negosyo maoy nagbukas sa ganghaan sa merkado alang sa iyang produktong Citronella oil dinhi sa Sugbo.

 Hinungdan ang usa sa konsehal sa lungsod sa Boljoon nga si Councilor Nephaley Ceballos miduso og resolusyon nga nag-awhag sa mga lokal nga mga mag-uuma nga motanum og Citronella grass isip alternative livelihood. Ang gobernador misaad hinuon nga mopadayon sa pagsuporta sa lana sa Citronella nga gikuha gikan sa dahon ug sa punoan sa nagkadaiyang species sa lemon grass. 

Ang produkto epektibo nga non-toxic mosquito repellent ug makaabog usab sa mga langaw ug gani gigamit kini sa Suroy-Suroy Sugbo pagprotiher sa mga pagkaon gikan sa mga langaw. (BANAT NEWS)