Z benefit package gilusad

CEBU, Philippines - Gihangop sa Department of Health (DOH) ang panagkombuya karon sa Philhealth Insurance Corporation ug sa Vicente Sotto Memorial Medical Center (VSMMC) sa gilusad kagahapon nga Z Benefit Package alang sa gitawag nga Case Type Z Illness   sa mga miyembro sa Philhealth.

Sa iyang pagpamulong didto sa VSMMC Auditorium si Regional Director Asuncion Anden sa DOH7 nagkanayon nga nalipay kaayo siya tungod kay ubos ning maong programa ang mga sakit nga komplikado ug mahalon kaayo tambayayongan sa Philhealth ug sa VSMMC aron nga masalbar ang pasyente nga di kaayo magbaguod sa gasto.

Ubos ning maong Z Benefit package, gikontrata sa Philhealth ang VSMMC nga sila’y moabaga sa gasto sa ilang mga miyembro nga magmasakit og breast cancer ug kidney. Sa maong proyekto ang Philhealth maoy moabaga sa gasto samtang ang mga doktor ug mga kahimanan sa VSMMC maoy moatiman sa pasyente.

Si Dr. Gerardo M. Aquino ang hepe sa VSMMC mapasalamaton kaayo sa Philhealth tungod sa pakigkontrata niini sa maong tambalanan aron matabangan ang mga kabus nga pasyente.

Ang VSMMC maoy usa sa unom ka mga tambalanan sa kagamhanan sa tibuok rehiyon 7 nga ubos sa pag-atiman sa DOH7 nga nakontrata sa Philhealth alang sa Z Benefit package.

Si Dr. Francis Javier, hepe sa Philhealth nagkanayon nga ang kwalipikado sa Z Benefit package mao kadtong mga miyembro sa Philhealth nga ubos sa kategoriya nga poorest of the poor nga magmasakit og breast cancer ug kidney.

Sa breast cancer mohatag ang Philhealth og P210 mil, samtang sa kidney transplant mohatag sila og P600 mil matag pasyente.

Ang maong mga salapi ideretso pagtunol sa Philhealth ngadto sa VSMMC alang sa operasyon ug sa mga tambal nga gikinahanglan sa pasyente.

Miingon si Javier nga ilang gilusad kining maong programa aron ang mga kabus nga mag-antos sa maog matang   balatian masalbar bisan walay kuwarta.

Midugang siya nga gitun-an pa nila karon ang pagpaubos usab sa sakit nga leukemia ug prostate cancer ubos sa Z Benefit package kana kun masuta nila nga andam na ang mga kahimanan sa VSMMC sa pag-atiman sa maong matang mga sakit.

Gisukit kun nganong sa kadaghang hospital sa rehiyon, ang VSMMC mao ilang gikontrata sa Z Benefit package, si Javier nagkanayon nga kini tungod kay nasuta nila nga kompleto ang kahimanan sa maong tambalanan alang ning maong bug-at nga matang sa sakit. (BANAT NEWS)