Sundalo, 2 kauban gipadakop

CEBU, Philippines - Tulo ka mga tawo usa kanila sundalo ang gidakop sa kapolisan sa Mandaue City Police Office human ireklamong nanion og armas sa duha ka traffic enforcers nga misitar kanila tungod sa kalapasan sa lagda sa trapiko.

Ang insidente nahitabo diha sa dalan C.D. Seno sa barangay Tipolo sa dakbayan sa Mandaue alas- 8 ang takna sa miaging gabii.

Ang mga mireklamo mao sila si Salvador Comedia, 37, ug Noel Mendoza, 38, mga sakop sa Traffic Enforcement Agency of Mandaue (TEAM) sa maong dakbayan.

Ang giingong sundalong nanion kanila og armas mao si Richard Taclapan, 24, taga barangay Cabancalan sa maong dakbayan ug giingong sakop sa 3rd Special Forces Battalion sa Philippine Army nga nadestino sa barangay Tagmamarkay, Tubay sa Agusan del Sur.

Kauban niini si Richys Lloyd Taclapan, 25, ug Rodel Lacsina, 25, pulos taga barangay Cabancalan sa maong dakbayan. Sumala pa gisitar sa traffic enforcers ang tulo ka tawong nag-angkasay ug walay gisuot nga helmet apan gitionan sila og armas.Nasuta usab nga walay lisensya ang drayber dihang sila nadakpan sa mga polis ug nasuta sa liquor test nga positibo silang nakainom. (BANAT NEWS)