Way oil spill sa naunlod nga barko

CEBU, Philippines - Nakigkita kagahapon ang Philippine Coast Guard ngadto kang Mayor Paz Radaza sa dakbayan sa Lapulapu may kalambigitan sa barkong nalunod diha sa kadagatan sa barangay Canjulao sa maong siyudad sa milabay’ng semana.

Si Rolando Punzalan Jr., Cebu Coast Guard Station Commander sa pakighinabi niini sa Banat News mibutyag nga mosumitir sila ngadto sa mayor sa report sa resulta sa ilang gipahigayong imbestigasyon.

Matud niini nga ‘stable’ ang gikahimutangan sa MV B & E Uno sa nahimutangan niini karon ilawom sa Mactan Channel tungod sa Canjulao.

Ang maong barko naunlod kini 50 ka tiil nga giladmon ug dunay gilay-on nga 150 ngadto sa 200 metros gikan sa pantalan.

Giklaro usab ni Punzalan nga wala silay nabantayang oil spill diha sa lugar gawas sa oil sheen o lama sa oil nga milutaw nga posibleng gikan sa makina sa barko.

Ang PCG mimando sa kompaniya nga kinahanglang ipakuha o ipasuyop ang krudo sa daling panahon. Nabalaka ang mga awtoridad sa dautang epekto niini sa dagat.

Ang barko dunay kargang 23,000 ka sakong mga semento migikan kini sa pantalan sa Iligan niadtong Biyernes sa alas 7:00 sa gabii ug gikatakda untang modunggo sa Sugbo sa alas 9:00 sa buntag apan nasangad kini.

Hinuon luwas ang 17 niini ka mga tripulante. (BANAT NEWS)