Yaya nakasakiyo og dul-an P2M

CEBU, Philippines - Nahimong instant milyonarya ang usa ka katabang apan gipangita na karon sa kapolisan human pasanginling midala sa dul-an P2 milyones nga kantidad sa kwarta ug alahas nga iya sa umagad sa tag-iya sa usa ka pawnshop.

Ang reklamante nailhan nga si Concepcion Quimbo Tecson, 76, molupyo sa Calderon Compound sa Banawa, barangay Guadalupe ning dakbayan.

Ang gipangita sa kapolisan mao si Maria Elena Madaje, 27, ug molupyo sa barangay Fatima lungsod sa Liloy, Zamboanga del Norte.

Base sa imbestigasyon sa Theft and Robbery Section sa Cebu City Police Office, Hunyo 29 sa hapon nananghid ang suspetsado sa kauban niining katabang nga si Regina Dandayo nga molakaw kay ipaayo niini ang iyang laptop.

Apan gabii na lang wala gyud kini mahibalik hinungdan nga nagduda na ang agalon niini ug gisubay ang ilang mga kabtangan ug diha nila madiskubrehing wala na ang ilang mga alahas ug kwarta.

Si Tecson nga nahinabi sa Banat News sa telepono mibutyag nga usa ka adlaw sa wala pa molayas ang suspek nagkagubot sa ilang balay tungod kay nawala ang allowance sa iyang apo apan wala lang nila kini panumbalinga.

Gihulagway ni Tecson nga ang mga alahas dunay sentimental value kaniya tungod kay ang uban niini mga kabilin sa iyang mga ginikanan nga nagkantidad tanan og P1.8 milyones, cash sa ilang pamilya nga moabot tanan og P127,000 uban sa mga mahalong gamit nga nagkantidad og kapin P43 mil.

Si Atty. Vicente Fernandez II mibutyag nga gikan sa mga sakop sa pamilya ug sa mga katabang ang mga alahas ug salapi, napulo ka checkbooks ug mga butang nga nawala. Si Dandayo giingong upat pa ka bulan nga nagtrabaho kanila.

Si PO3 Jovito Labra ang imbestigador sa TRS mibutyag nga ‘trained’ nga kawatan ang suspek ug karon pa sila makadungog nga ang usa ka yaya adunay mga laptop ug mahalong mga gadgets.

Ilaha usab subayon ang report bahin sa report nga dunay nagpailis og blangko nga tseke sa usa ka bangko didto sa Iligan City nga nagpailang paryente ni Tecson apan dihang gikumpirmar niadtong Lunes walay transaksyon ang mga Tecson sa maong bangko.(uban sa report ni Niña Sumacot/EIM) (BANAT NEWS)