Sa Kasaysayan karon

Kabayang Noli

CEBU, Philippines - 1949—Gipanganak si Bise Presidente Manuel Leuterio de Castro Jr. sa Pola, Oriental Mindoro. Si de Castro mas naila sa mga Filipino nga si “Kabayang Noli de Castro” sa telebisyon sa ABS-CBN channel ug nahimong bise presidente ni kanhi presidente Gloria Macapagal Arroyo.

Fingerprint vs krimen

1905—Ang fingerprint ni John Walker maoy labing unang fingerprint sa tawo nga napasa sa usa ka law enforcement unit ngadto sa ubang law enforcement unit sa ubang nasud. Ang fingerprint ni Walker gikan sa St. Louis, MO. sa Estados Unidos ngadto na sa London, UK sa Uropa. Ang pagbinayloay sa kapolisan sa mga fingerprints sa mga notadong kriminal maoy nahimong dalan sa pagkasikop sa gatosang mga personaheng nagtagotago sa balaod sa Uropa ug sa Amerika.

Rabies vaccine

1885—Nadiskubrehan ug gisuwayan sa French scientist nga si Louis Pasteur uban sa iyang mga kaubanang doktor ang bakuna kontra rabies ngadto sa usa ka tawo. Si Pasteur ug mga kaubanan mi- inject una sa 14 doses nga ihatag sulod sa 14 ka adlaw sa 9-anyos nga batang si Joseph Meister kinsa napaakan sa usa ka irong buang duha ka adlaw na ang milabay. Gamit ang maong bakuna nga ginama sa rabbit spinal cord suspension nga dunay “inactivated rabies virus” migawas nga epektibo kini batok sa maong virus. Kini maoy nahimong dalan sa modernong pagpamakuna. Ang rabies kaniadto gitawag pa og sakit nga “hydrophobia” o ang pagkahadlok sa tubig. Ang maong bata midako ug nahimong caretaker sa Pasteur Institute sa Pransya hangtud sa edad nga 64-anyos.