Sikyu sa pabrika i-polygraph test

CEBU, Philippines - Ipaubos sa polygraph examination o lie detector test ang gwardiya sa pabrika sa bihon sa barangay Cansojong, Talisay nga gitulis sa tulo ka mga lalaki niadtong milabay’ng Hunyo 30 sa buntag.

Si Supt. Eddie Recamara, hepe sa Talisay City Police Station nga nahinabi sa Banat News nagkanayon nga dunay mga wala pagkatakdo sa mga tubag sa gwardiyang si Jonathan John Adlawan nga buot nilang klaruhon.

Matud pa ni Recamara wala magtakdo ang mga tubag sa gwardiya sa mga tubag sa mga saksi sa hitabo. Si Adlawan nangangkong natapsingan siya dihang gipusil sa usa sa tulo ka tulisan.

Hinuon duna nay mga pangalan ang kapolisan sa tulo nga gidudahang mga kanhi kawani sa maong pabrika.

Kahinumduman nga niadtong Sabado sa gabii ang Ebra Promotion and Ayala Center, Cebu Business Management and Services diin ang buhatan nahimutang diha sulod sa compound sa pabrika gitulis sa tulo ka mga lalaki ug si Adlawan gipusil.

Si Adlawan nangangkong nakuyapan human siya pusila sa tulisan samtang ang warehouseman sa factory nga si Jessie Jacson, 19, nakaangkon usab kini og samad pinusilan sa walang abaga dihang misuway og punit sa usa ka butang nga natagak gikan sa motorsiklong gisakyan sa mga tulisan. (/EIM) (BANAT NEWS)