CEBU, Philippines - Nagpahigayon og “loyalty check” si Gob. Gwendolyn Garcia sa mga mayor nga sakop sa One Cebu Party diha sa Marco Polo Hotel niadtong miaging gabii pipila ka adlaw human gipahibawo sa Bakud Party ni Danao City Vice Mayor Ramonito Durano III ang ilang pormal nga pagbiya sa One Cebu ug pakig-alyansa sa Liberal Party (LP).
Ang alyansa miresulta sa pag-tandem nila ni LP gubernatorial bet Hilario Davide III ug Bise Gobernador Agnes Magpale alang sa 2013 election sa igsuon ni Garcia nga si Kong. Pablo John Garcia.
Atol sa tigom sa One Cebu mitambong ang mga mayor sa unang distrito sama nila ni Sibonga Mayor Lionel Bacaltos, Carcar City Mayor Necipuro Apura, Naga City Mayor Valdemar Chiong, Minglanilla Mayor Eddie Selma ug Talisay City Mayor Socrates Fernandez.
Hinuon si Chiong miklarong dili “loyalty check” ang pagpatawag sa tigom kay ‘dinner meeting’ ra kini ug paghimamatay ug konsultasyon sa ilang mga kaubanan.
Samtang si kanhi mayor Nenet Reluya maoy mitambong isip representante sa ilang partido sa lungsod sa San Fernando sanglit si Mayor Abe Canoy sakop man sa LP.
Gitug-an ni Apura dihang nahinabi sa Banat News nga gikasabutan nilang ilahang suportahan si Garcia sa plano niining pagpapili pagka senador ug kang Kong. Pablo John Garcia pagka gobernador ubos sa One Cebu .
Hinuon gitug-an ni Apura nga una nang gikasabutan nila sa Alayon Party ni Kong. Eduardo Gullas nga suportahan si Magpale nga runningmate ni Davide. (/EIM) (BANAT NEWS)