CEBU, Philippines - Talandugon ang kahimtang sa usa ka public school teacher human kini gitigbas sa gibuwagan na niining bana nga usa ka sundalo samtang sila ‘naghusay’ unta sa ilang mga deperensya sa sulod sa ilang balay.
Ang krimen nahitabo diha sa balay sa magtiayon sa sitio Suba sa barangay Poblacion sa lungsod sa Argao niadtong Lunes sa alas 9:45 sa gabii nga miresulta sa pagkaangol ni Pacita Caminero Binghit, 40.
Si Binghit magtutudlo sa Argao Central School sa lungsod sa Argao ug nagpuyo sa barangay Lamatan Argao, samtang ang suspek nga iyang bana mao si Jun Pamor Binghit, 38, giingong sakop sa Philippine Navy nga nagbase sa dakbayan sa Lapulapu.
Matud ni PO2 Benjamen Gerozaga ang desk officer sa Argao Police Station nga nahinabi sa Banat News dugay nang nagbuwag ang magtiayon tungod kay giingong dagmalan ang suspek.
Dugang pa ni Gerozaga, sa wala pa mahitabo ang krimen mihangyo ang suspek nga makigkita sa biktima aron husayon ang ilang panagbangi nga giuyonan usab sa biktima.
Apan dangtan pila ka minutos sa ilang panagtabi giingong nananghid ang suspek nga motubag sa sugo sa lawas apan nakurat na lang ang ginang diha sa pagbalik sa bana nagbitbit na kini og sundang ug gidunggab ug gitigbas siya niini sa likod.
Ang biktima nakaangkon og samad tinigbasan sa luyong bahin sa ulo ug duha niini ka mga kamot tungod sa pagsuway sa pagpanagang.
Ang suspek nagdaling nisibat pahilayo apan naabtan sa mga polis nga migukod kaniya samtang gidala sa Isidro Kintanar District Hospital ang biktima ug gibalhin sa usa ka tambalanan sa dakbayan sa Sugbu tungod sa kagrabe sa kahimtang niini.
Ang suspek kinsa malinawong mitahan sa kapolisan gikatahong gihatud sa mental hospital tungod sa gipakita niining lihok sulod sa karsel nga daw nalisoan kini og pangisip. (BANAT NEWS)