2 trak nga bomba nakuykuyan

CEBU, Philippines - Duha ka mini-truck nga mga vintage bombs o explosive ordnance ang nakuykuyan diha sa Tinguan Stockyard nga nahimutang sa Banilad syudad sa Mandaue sa miaging adlaw pasado alas-5 sa hapon.

Ang hepe sa kapolisan sa Subangdako nga si Inspector Ramil Morpus mibutyag sa Banat News nga ang tagdumala sa maong stockyard maoy mipahibalo kanila kabahin sa maong mga bomba.

Sumala pa ni Morpus wala mobutyag ang tagdumala kinsa wala niya hinganli kun asa gyud nila kini makuha gawas lang sa pag-ingon nga kini ilang ‘nakuykoyan’ diha sa nahisgutang lugar.

Sa diha nga nadiskubrehan sa mga trabahante ang maong bomba dali kining nangayo og tabang sa kapolisan sa Subangdako, inabagan sa Special Weapons and Tactics Teams sa syudad sa Mandaue ug syudad sa Sugbo gikuha nila ang dul-an 400 ka mga bomba.

Ang maong mga bomba nga gituohang mga drop bombs ug artillery shells nga nagkadaiya ang gidak-on sama sa gidak-on sa mga paa matud pang Morpus mga bomba kini sa Ikaduhang Kalibutanong Gubat, ang Cebu maoy usa sa dunay labing daghang panag-engkwentro tali sa mga sundalong Filipino ug Amerikano batok sa mga Hapon sa maong panahon.

Matud pa ni Morpus nga 35 sa maong mga bomba ang nadiskubrehan sa mga Explosives Ordnance Experts sa SWAT ug Central Command EODs nga duna pay mga pulbora ug posible pang mobuto, kini gihipos una diha sa usa ka luwas nga lugar sa barangay Looc.

“Ang atong priority ani ang safety sa public ug sa kapulisan, the immediate proposal is to dispose,” sumala pang Lt. Col. Christopher Tampus ang tigpamaba sa Centcom.

Ang mga bomba miabot og 4,700 ka kilo o dul-an lima ka tonelada ug hinayhinay nga gikarga sa duha ka trak aron hipuson. (/EIM)(BANAT NEWS)