CEBU, Philippines - Samdan sa bukton ang usa ka drayber sa traysikad human kini dunggaba sa duha ka tulisan nga misakiyo sa iyang P200 didto sa sitio Tacan, barangay Babag, dakbayan sa Lapulapu sa miaging gabii.
Ang biktima mao si Wilbert Bayotlang, 19, ulitawo, nga taga sitio Sun-ok, barangay Ibabao, lungsod sa Cordova ug driver sa traysikad .
Si PO2 Winston Ybanez sa kapolisan sa maong lungsod nga nahinabi sa Banat News miingon nga namasahero ang biktima sa maong higayon ug samtang nagpaabot og pasahero miduol kaniya ang duha ka wala hiilhing lalaki nga nagpahatod ngadto sa barangay Basak, sa maong dakbayan.
Dugang pa ni PO2 Winston Ybanez nga dihang naabot na sila sa maong dapit gipahunong sa maong mga pasahero ang traysikad.
Dayon nanaug ang usa ug mition sa iyang kutsilyo ngadto sa biktima uban sa pagpahibawo nga tulis.
Gumikan kay nagmagahi ang biktima sa paghatag sa iyang P200 nga kinitaan, nasuko ang tulisan ug gihansakan siya sa kutsilyo.
Sa paningkamot nga dili modapat sa iyang lawas ang kutsilyo, iya kining gisagang sa iyang bukton nga maoy gitaroyan sa kutsilyo sa tulisan.
Misiyagit og panabang ang biktima ug sa kabalaka sa mga tulisan nga hiabtan sila sa polis misirit kini og panagan pahilayo sa maong lugar.
Gihatud sa mga tagtungod ang biktima ngadto sa Vicente Sotto Memorial Medical Center sa dakbayan sa Sugbo samtang gipangita pa sa kapolisan ang mga tulisan. (BANAT NEWS)