10 anyos nataligam-an nalumos

CEBU, Philippines - Namatay ang usa ka 10 anyos nga batang lalaki kay nataligam-an kini sa mga ginikanan samtang naligo sa usa ka pribadong swimming pool sa pribadong beach resort didto sa barangay Jubay lungsod sa Liloan niadtong Domingo sa alas 2:00 sa hapon.

Ang biktima nailhan nga si Timoteo Fernandez, 10, tinun-an sa grade 4 sa Mambaling Elementary School sa dakbayan sa Sugbo nga taga Ibabao, Mambaling ning siyudad.

Si PO1 Raymund Almonicar sa Liloan Police Station mibutyag sa Banat News nga ang biktima kauban sa iyang ginikanan ug uyoan nga nangaligo sa maong lugar.

Apan gumikan sa kalingaw sa tanan, wala mabantayi sa iyang mga ginikanan nga nalumos ang biktima.

Sa dihang naniudto na sila didto pa nila mahinumdomi ang biktima kay wala na nila kini makita ug didto pa sila magsugod sa pagpangita niini.

Ang uyoan sa biktima nga si Eduardo Mansueto, 31, mibutyag sa kapolisan nga alas 2:00 na sa hapon napalgan ang bata nga didto ra sa hawanan sa swimming pool ilawom sa tubig nga wala nay panimuot hinungdan nga gihatud dayon nila ngadto sa Liloan Community Clinic apan gideklarar kini nga dead on arrival (DOA). (BANAT NEWS)