CEBU, Philippines - Wala pirmahi ni Mayor Michael Rama ang kontrobersyal nga ordinansa sa Konseho nga magsilot sa mga ginikanan nga mopasakit sa ilang mga anak sa pagdisiplina.
Gipahibalo kini ni Rama atol sa iyang State of the City Address kagahapon dungan sa pagpahibalo nga patun-an niya kang Konsehal Edgardo Labella ug Konsehal Joey Daluz ang maong ordinansa nga giumol ni Konsehal Leah Ouano-Japson.
Matud pa sa mayor nga nagkulang ang konseho sa pagtuki sa maong ordinansa ug iyaha kining gihulagway nga “anti-poor” tungod kay sigurong ang mga kabus nga mga ginikanan ray masilotan ug maglisod pa gani pagbayad sa multa nga P5,000 sa maong ordinansa.
Kahinumduman nga sa miaging semana giaprobahan sa konseho ang ordinansa nga mosilot sa mga ginikanan nga hinagmal og anak sa tuyo nga maprotehian ang kabataan gikan sa pagpangabuso.
Malakip usab sa masilotan ang mga maestra ug ubang “guardians” sa kabataan.
Una nang gipadayag ni Japson nga samtang ang mga ginikanan adunay katungod pagdisiplina sa ilang mga anak apan kinahanglang dili sobra nga mogamit na og hulga ug pagpanakit.
Apan daghang mga sektor nga wala makauyon niini sama sa Human Life International. Bisan si Cebu Archbishop Jose Palma wala mopabor o mosupak niini apan kini miklarong ang mga ginikanan dunay katungdanan sa pagdisiplina sa ilang mga anak nga may kaubang pagmahal. (BANAT NEWS)