Plebisito sa Guadalupe kwestiyonon

CEBU, Philippines - Kwestiyonon ni Labangon Barangay captain Victor Buendia sa Commission on Election-Comelec Manila ang pagtakda niini sa plebisito alang sa pagbuwag sa Sitio Banawa ug Englis gikan sa barangay Guadalupe sa umaabot nga Hulyo 28 ning tuiga.

Gibutyag kini ni Buendia sa Banat News kay matud niya nakugang siya sa kalit nga pagtakda sa Comelec sa maong plebisito nga wala magpahibawo kaniya.

Matud pa ni Buendia nga wala pa masulbad ang gisang-at nilang petisyon ngadto sa konseho sa dakbayan sa Sugbo kalabot sa maong isyu.         Ang maong petisyon may labot sa utlanan tali sa Labangon ug Guadalupe sa Sitio Banawa.

Gani miingon si Buendia nga nagpaabot pa siya nga ipatawag sila sa konseho uban sa mga opisyal sa Guadalupe aron resulbahon ang mao gilalisan nilang utlanan.

Apan naunsa bang pagkaunsaa nga kalit man lang nga gipahibawo ni kanhi Kongresista Antonio Cuenco pagbuwag sa Banawa–Englis gikan sa Guadalupe.

Gumikan niini mibahad si Buendia nga iya gyung padad-an og suwat si Comelec chairman Sixto Brillantes aron iyang pasabton nga dili pa makatarunganon ang pagtakda sa plebisito tungod kay wala pa mahusay ang ilang boundary dispute. Midugang siya nga hatagan usab niya og kopya sa maong suwat ang buhatan sa Comelec dinhi sa dakbayan sa Sugbo.

Sulod ning semanaha ang target ni Buendia nga mapadala ang maong suwat ngadto kang Comelec Chairman Brillantes.

Si Buendia padayong mi-insister nga sakop gyud sa Labangon ang Dona Rosalina Village diha sa Banawa ug dili sa Guadalupe.

Mi-insister usab siya nga moabot sa luyong bahin sa buwangan sa Banawa nga karon gitukoran na og usa ka mall ang pag-utlan sa Labangon ug Guadalupe.

Matud sa kapitan nga dako kaayo sila og alkansi kun dili nila masuta ang tinuod nga utlanan tungod kay mogamay man ang ilang total land area sa barangay ug mogamay usab ang ilang kita.

Hinuon ang vice president sa United Banawa Englis Separation Movement Association   nga si Jeffrey Cartilla mihulagway nga karaang isyu na ang giduso ni kapitan Buendia.

Busa iyang giawhag si Buendia nga mas maayo pang ihiklin nalang ang maong boundary dispute   ug unya nalang kana talingaha kun mahuman na ang plebisito.

Hinuon miingon si Buendia nga kun ipadayon ang plebisito mas maayong pabotaron usab sila kay apektado na usab sila kun dili mahilot ang kasungi-an sa ilang boundary sa barangay.

Samtang si Guadalupe barangay captain Micheal Gacasan igo lang mi-awhag sa mga molupyo sa barangay nga mobotar atol sa plebisito aron mahibaw-an ang tinuoray nga baruganan sa mga molupyo, pabor ba sila o supak nga mabahin sa duha ka barangay Guadalupe. - WC (BANAT NEWS)