Rota sa 07D patas-an Hangyo sa Labangon wala tuguti

CEBU, Philippines - Wa tuguti sa Cebu City Council ang hangyo sa mga opisyales sa barangay Labangon nga patas-an pa ang rota sa mga pasaheroang nagdagan sa Salvador Street aron unta mas maserbisyohan pa og maayo ang mga sumasakay ilabi na ang mga tinun-an. Si Councilor Richard “Ritchie” Osmeña, ang tsirman sa Committee on Traffic Management, miingon nga dunay kamatuoran ang argumento sa City Traffic Operations Management (CITOM) nga makahuot hinuon sa trapiko ilabi na diha sa Tres de Abril kun tugotan ang rotang 07D makalahos.

Sa gihimong sesyon sa Labangon Barangay Council nga gi-preside ni Barangay Kapitan Victor Buendia gisugyot nga ang rotang 07D gikan sa Banawa tugutang makalahos sa Katipunan Street ini og abot niini sa Tres de Abril Street.

Gikan sa Tres de Abril ang mga PUJ kinahanglang moliko sa tuo balik sa Salvador Street ngadto na sa ilang destinasyon diha agi sa Kapitolyo padulong sa Carbon market.

“The suggested route is a more plausable alternative as more people are benefited, specially the students of the schools engulfed by the route,” sumala pang Buendia sa ilang hangyo.

Mas gihatagan og gibug-aton ni Osmeña ang eksplinasyon sa CITOM nga ang Katipunan ug Tres de Abril gamay lang nga dalan ug duna nay rotang nagsubay niini nga mao ang rotang 12L ug kun dugangan pa kini sa 07D maghuot gyud kini. Dugang pa sa report sa CITOM nga gikan sa eskina sa Salvador Street ug Tres de Abril padulong Katipunan bisan two-lane lima ra kini ka metros ang gilapdon.

“Since the report of CITOM is not disputed, there being no valid reason which can justify its reversal and CITOM being the agency primarily tasked on traffic management in the city especially on technical matters, the Committee on Traffic Management should give credence to the said report,” matud pang Osmeña.

Gisugyot hinuon ni Osmeña nga imbes patas-an ang rota mas maayo pang higpitan ang pagpatuman sa pagsunod sa rota sa maong mga jeepney tungod kay ang rason sa maong hangyo mao man ang wala pagsunod sa mga jeepney sa ilang rota.

Ang dili pagsunod sa rota sa mga pasaheroan o ba kaha dili paglahos sa ilang rota may multa nga di momenus og P1,000 ug suspensuhon sulod sa usa ka bulan ang lisensya sa drayber. (FREEMAN)