One Cebu ug Alayon magtigom

CEBU, Philippines - Gipaabot nga magtigum unya ang One Cebu Party ug Alayon Party aron planohon pag-ayo ang mga kaakohan niini sa umaabot nga election sa tuig 2013.

Matud pa ni Third District Congressman Pablo John PJ Garcia nga takduon niya ug ni Kongresista Eduardo Gullas   ang adlaw ug higayon aron sila magkatagbo.

Si PJ Garcia nga maoy secretary general sa One Cebu Party maoy gitugpo sa partido nga himoong kandidato sa pagka-gobernador sa Sugbo.

Ang labing mahinungdanong butang nga hisgutan sa duha ka dagkong haligi   sa One Cebu ug Alayon mao ang mga estratihiya ug mga sistema nga angay nilang sagupon aron masiguro ang kadaugan sa ilang mga kandidato sa piniliay.

Matud pa ni PJ Garcia nga gumikan sa maayo nilang relasyon ni Gullas wala siyay nakitang babag alang sa gitakda nilang tigum.

Sayo niini migawas na sa mga pamantalaan ang plano ni Gullas nga makig-alyansa sa One Cebu alang sa umaabot nga piniliay.

Samtang nagpasalamat   usab si Congressman PJ Garcia sa Bakud Party kinsa mipasalig nga andam kining mosuporta kang Gobernador Gwen Garcia sa kandidatora niini pagka-senador .

Apan sa gihapon luyo sa kabaniog na sa tanyag ni magpapatigayon Glenn Soco nga buot siyang makig-tandem kang PJ Garcia sa pagka-bise gobernador, sa gihapon ang naulahi nagdumili pa sa pagbutyag kinsay mahimo niyang kapares.

Kini tungod kay dili  sila gusto nga ipagya dayon sa publiko kun si kinsa ang ilang mapili nga runningmate niya kay dili siya gusto nga daghan unya ang masakitan.

Apan iyang gitataw nga padayon ang ilang selection process ug sa dili madugay ila nang ipahibawo sa publiko ang mapilian sa partido nga mahimong kandidato sa pagka-bise gobernador sa One Cebu Party human si Bise Gobernador Agnes Magpale mitapon sa Liberal Party. (FREEMAN)