Tanod mipusil angol sa miluba sa kuyme

CEBU, Philippines - Kritikal ang kahimtang sa usa ka tawo nga gipusil   sa barangay tanod human manunggab ang nahauna sa usa ka kuyme sa basketball didto sa barangay Cambohawe, lungsod sa Balamban sa miaging gabii.

Ang napusilan ni barangay tanod Oliver Oliverio sa Cambohawe mao si Floro “Odik” Blanco, 54, kinsa nasabak sa walang tampihak.

Kini human lubaa sa maong biktima si Ludwig Rillanos Taborada , hingkod, ang tanan pulos managsilingan sa Cambohawe.

Sa pakighinabi sa Banat News ni PO2 Hannibal Larida sa Balamban Police Station nasayran nga sayo niini ang biktimang si Taborada ug Blanco nagkalalis bahin sa duwa sa basketball nga gikuymehan ni Taborada.

Unya midugang si Larida nga human sa maong lalis mipauli si Blanco apan sa pagbalik niini diretsong miluba kang Taborada.

Samtang si Oliverio miduol aron santaon si Blanco, apan nakurat na lang ang mga misaksi sa basketball dihang gipusil niini si Blanco sa tampihak.Human mahagba si Blanco sa yuta, misibat dayon si Oliverio ug karon padayon kining gipangita sa kapolisan. Samtang ang duha ka mga angol dali nga gihatod sa tambalanan sa dakbayan sa Sugbo. – WC (FREEMAN)