5 Tinun-an nasudla'g espiritu

CEBU, Philippines - Lima ka mga tinun-ang babaye sa high school sa barangay Jugan sa Jugan National High School didto sa lungsod sa Consolacion ang nakuyapan kini atol sa klase ug gituohang nasudlan sa dautang espiritu kagahapon sa buntag.

Sumala pa niini, unang nakuyapan samtang nag-ampo human sa flag raising ceremony ang usa ka tinun-ang babaye nga ilang gitabang tungod kay nangluspad og maayo ug nalup-og. Human gitabang ang duha nagka-komosyon na usab tungod kay dunay tulo ka mga tinun-ang babaye gihapon nga giingong nagdungan og kalup-og ug giingong nakuyapan.

Dunay usa nga giingong nangangkong dunay ‘motuok’ kaniya ug gikugos nalang sa amahan pauli.

Tungod niini mikatap ang kabalaka ug kahadlok sa mga tinun-an ug mga ginikanan tungod sa pagtuong nasudlan sila og dautang espiritu hinungdan nga nangabot ang mga ginikanan ug buot sila kuhaon. Apan giklaro dayon kini sa ilang prinsipal nga si Emilia Ibones dihang nahinabi sa Banat News sa telepono nga ‘kabuhi’ lang kadto tungod kay wala makapamahaw og tarong ang mga bata.

“Dala rang kabuhi, basin tan-aw nako dala ra tong kabuhi kay buntag baya basin wala to makatarong og kaon,” pagduda pang Ibones.

Matud pang Ibones tungod kay nabalda na ang klase gipapauli nalang sila ug gimandoan sa pagbalik pagkahapon. Hinuon nahinayon gyud ang klase kagahapon sa hapon.

Gikatahong nangahadlok ang mga bata ug ginikanan tungod kay nagtuo silang nangasuko ang namuyo sa mga gipamutol nga kahoy sa sulod sa compound sa maong tunghaan.

Ang maong lugar nga gipamutlan og kahoy gikatakdang tukoran og edipisyo aron matubag ang problema sa kakulangan sa lawak-saringan sa maong tunghaan apan giklaro ni Ibones nga sayop ang migawas sa balita sa usa ka sibyaanan nga dagkong kahoy ang gipamutol tungod kay gagmay kini nga mga punoan ug duna silay permiso niini. (/EIM) (BANAT NEWS)